Meginmál

Unnur Gunnarsdóttir ráðin forstjóri Fjármálaeftirlitsins

ATH: Þessi grein er frá 5. júlí 2012 og er því orðin meira en 5 ára gömul.

Unnur Gunnarsdóttir, sem verið hefur settur forstjóri Fjármálaeftirlitsins frá 1. mars síðastliðnum, hefur verið ráðin forstjóri Fjármálaeftirlitsins. Unnur er lögfræðingur frá Háskóla Íslands og stundaði framhaldsnám í lögum bæði í Englandi og Kanada. Hún gegndi áður starfi yfirlögfræðings Fjármálaeftirlitsins. 

Unnur hefur víðtæka reynslu af störfum við fjármálatengd verkefni, opinbera stjórnsýslu og í dómskerfinu. Hún starfaði meðal annars í sjö ár hjá bankaeftirliti Seðlabanka Íslands og í fimm ár sem sérfræðingur í fjármálaþjónustu hjá EFTA skrifstofunni í Brussel. Þá var hún framkvæmdastjóri Fjölgreiðslumiðlunar í tvö ár. Innan opinberrar stjórnsýslu hefur Unnur meðal annars reynslu sem skrifstofustjóri í samgöngu- og sveitastjórnarráðuneytinu í sjö ár og sem settur héraðsdómari við Héraðsdóm Reykjavíkur.

Unnur var valin úr hópi tíu umsækjenda að undangengnu ítarlegu ráðningarferli. Ferlinu er lýst í Skýrslu stjórnar Fjármálaeftirlitsins um ráðningu forstjóra sem birt hefur verið á vef Fjármálaeftirlitsins. Í niðurlagi skýrslunnar segir meðal annars:

„Unnur hefur sterka sýn á framtíð eftirlitsins, þar sem hún leggur áherslu á vernd almannahagsmuna, virkt starf gegn brotum, greiningu og áhættumat, uppbyggingu trausts og að Fjármálaeftirlitið taki alvarlega vaxandi kröfur til þess um að vinna að fjármálastöðugleika.“