Málstofa verður haldin þriðjudaginn 19. maí kl. 15:00 í fundarsal Seðlabankans, Sölvhóli.
Málshefjendur eru: Karen Á. Vignisdóttir og Þorvarður Tjörvi Ólafsson, hagfræðingar á hagfræðisviði Seðlabanka Íslands.
Erindi þeirra ber heitið: „Verðákvarðanir fyrirtækja á tímum mikillar verðbólgu og gengissveiflna.“
Ágrip:
Á málstofunni verða kynntar niðurstöður könnunar á verðlagsákvörðunum íslenskra fyrirtækja. Skilningur á því hvernig fyrirtæki ákvarða verð skiptir miklu máli þar sem verðmyndun gegnir lykilhlutverki í haglíkönum, verðbólguþróun og miðlunarferli peningastefnunnar. Á undanförnum áratug hafa seðlabankar víða um heim lagt mikla vinnu í að rannsaka verðlagningu fyrirtækja til að bæta spágerð og styðja við stefnumótun í peningamálum. Verðlagning íslenskra fyrirtækja er sérstaklega áhugaverð í ljósi krefjandi aðstæðna í efnahagsmálum og mikilla áhrifa gengissveiflna á verðmyndun. Íslenska rannsóknin er einstök í alþjóðlegu tilliti hvað varðar umfang skoðunar á áhrifum gengisbreytinga á verðmyndun fyrirtækja. Niðurstöðurnar bregða m.a. upp mynd af því hve áhrif gengisbreytinga á verðlag eru ósamhverf.