Í dag klukkan 15:00 verður haldin málstofan „Viðbrögð við bankahruninu á Íslandi: var til betri leið?“ í fundarsal Seðlabankans, Sölvhóli. Frummælendur verða Þorsteinn Þorgeirsson og Paul van den Noord og verður fyrirlesturinn á ensku.

Bankahrunið á Íslandi í október 2008 var eitt það stærsta í nútíma fjármálasögu. Ísland var jafnframt fyrsta landið til að lenda í fjármálakreppu sem hófst árið 2006 en einnig það fyrsta til að byrja að reisa sig við eftir hrunið. Viðbrögð stjórnvalda við hruninu, með aðstoð Alþjóðagjaldeyrissjóðsins og nágrannaríkja, áttu þátt í að takmarka skaðann og búa í haginn fyrir endurreisn efnahagslífsins. Í þessari málstofu munu Þorsteinn Þorgeirsson, ráðgjafi seðlabankastjóra, og Paul van den Noord, ráðgjafi aðalhagfræðings og aðstoðarframkvæmdastjóra OECD, kynna niðurstöður rannsókna á því hvaða áhrif það hefði haft ef stjórnvöld hefðu gripið til annarra úrræða til að bregðast við hruninu. Fjórar mögulegar sviðsmyndir með keyrslum í tveimur samverkandi þjóðhagslíkönum verða skoðaðar og áhrif metin fyrir opinber fjármál, hagvöxt, atvinnuleysi og aðrar hagstærðir á tímabilinu 2009-2025 hefðu stjórnvöld ákveðið að:

1) beita hagvaxtarhvetjandi fjármálastjórn hins opinbera,

2) láta krónuna falla án þess að grípa til fjármagnshafta,

3) greiða vaxtakostnað af Icesave-samningnum eins og upphaflega var gert ráð fyrir, eða

4) bjarga íslensku bönkunum með hliðsjón af írsku leiðinni.

Niðurstöðurnar verða bornar saman við þá leið sem farin var.

Málstofan hefst klukkan 15:00 í fundarsal Seðlabankans, Sölvhóli. Gengið er inn frá Arnarhóli.