Fyrsta tölublað ársins af Fjármálum, vefriti Fjármálaeftirlitsins, er komið út. Efni Fjármála er afar fjölbreytt að þessu sinni. Bryndís Ásbjarnardóttir, forstöðumaður þjóðhagsvarúðar fjallar um sveiflujöfnunarauka og kerfisáhættu í samnefndri grein. Loftur Hreinsson, sérfræðingur í þjóðhagsvarúð skrifar um greiningu á viðnámsþrótti heimila og fyrirtækja og Jón Guðjónsson, sérfræðingur í þjóðhagsvarúð spyr: Hefur hækkun fasteignaverðs aukið kerfisáhættu á fjármálamörkuðum?
Í blaðinu er einnig að finna tvær greinar varðandi efni sem fallið getur undir sjálfbær fjármál eða sustainable finance. Sigurður Freyr Jónatansson, sérfræðingur í þjóðhagsvarúð, skrifar um grænan fjármálamarkað og áhrif loftlagsbreytinga og aðgerða í loftslagsmálum á fjármálamarkað og Björn Z. Ásgrímsson, sérfræðingur í áhættugreiningu, fjallar um lífeyrissjóði og ábyrgar fjárfestingar.
Að lokum fjallar svo Helga Rut Eysteinsdóttir, lögfræðingur á sviði lagalegs eftirlits og vettvangsathugana, um ný heildarlög um aðgerðir gegn peningaþvætti og fjármögnun hryðjuverka.