Sjálfbærniskýrslan inniheldur sjálfbærniupplýsingar úr rekstri bankans ásamt því að greina frá hvernig bankinn innleiðir loftslagsmál og sjálfbærni í kjarnastarfsemi sína. Þá er reifað hvernig bankinn miðlar upplýsingum og styður við innleiðingu á sjálfbærni fyrir þá starfsemi sem hann hefur eftirlit með.
Seðlabanki Íslands hefur gefið út sjálfbærniskýrslu fyrir starfsemi sína og nær hún til ársins 2022. Sjálfbærniskýrslan er árleg útgáfa sem ætlað er að styðja það markmið bankans að ná frekari árangri á sviði sjálfbærni.
Sjálfbærniskýrslan inniheldur sjálfbærniupplýsingar úr rekstri bankans ásamt því að greina frá hvernig bankinn innleiðir loftslagsmál og sjálfbærni í kjarnastarfsemi sína. Þá er reifað hvernig bankinn miðlar upplýsingum og styður við innleiðingu á sjálfbærni fyrir þá starfsemi sem hann hefur eftirlit með.
Formáli seðlabankastjóra og varaseðlabankastjóra
Í samantekt sjöttu matsskýrslu Milliríkjanefndar Sameinuðu þjóðanna um loftslagsbreytingar (IPCC) kveður enn á ný við kunnuglegan tón. Í skýrslunni kemur fram að áhrif mannsins á umhverfi sitt hafa leitt til hlýnunar loftslags um 1,1 gráðu frá seinni hluta 19. aldar en nú er svo komið að hvert gráðubrot í hlýnun hefur stigmagnandi áhrif, ekki bara á veðurfar og uppskeru, heldur einnig á lífsskilyrði og velferð milljóna manna um allan heim.
Eitt meginmarkmið Parísarsáttmálans er að takmarka röskun mannkyns á loftslagi jarðar í þeim tilgangi að takmarka hnattræna hlýnun eins nálægt 1,5 gráðum og hægt er. Stjórnvöld, atvinnulíf og félagasamtök víða um heim hafa sett sér skilgreind markmið um samdrátt í losun gróðurhúsalofttegunda í samræmi við Parísarsáttmálann. Samkvæmt lögum um loftslagsmál nr. 70/2012 ber Stjórnarráði Íslands, ríkisstofnunum og fyrirtækjum í meirihlutaeigu ríkisins að setja sér loftslagsstefnu með skilgreind markmið um samdrátt í losun gróðurhúsalofttegunda og kolefnisjöfnun. Seðlabanki Íslands er þar engin undantekning en samkvæmt umhverfis- og loftslagsstefnu bankans skuldbindur hann sig til að draga úr losun gróðurhúsalofttegunda um 40% fram til ársins 2030 miðað við árið 2019.
Sjálfbærniskýrsla Seðlabanka Íslands kemur nú út í annað sinn. Í henni er fjallað um aðgerðir Seðlabanka Íslands í sjálfbærni- og loftslagsmálum árið 2022, sjálfbærniupplýsingar úr rekstri bankans og hvernig hann innleiðir sjálfbærni í kjarnastarfsemi sína. Skýrslunni er ætlað að vera upplýsandi um aðgerðir bankans en einnig hluti af ábyrgðarskilum bankans gagnvart markmiðum sínum í loftslags- og sjálfbærnimálum.
Enn er mikið verk að vinna í loftslags- og sjálfbærnimálum, líkt og sjötta matsskýrsla Milliríkjanefndar Sameinuðu þjóðanna um loftslagsbreytingar gefur til kynna. Þótt meginábyrgðin á því að innleiða stefnu, tryggja fjármagn til að draga úr loftslagsáhættu og stuðla að skipulegri umbreytingu í kolefnishlutlaust hagkerfi og sjálfbært samfélag liggi hjá öðrum stjórnvöldum er mikilvægt að Seðlabanki Íslands leggi sitt af mörkum á sínu ábyrgðarsviði