Í apríl hóf Seðlabanki Íslands reglubundin gjaldeyriskaup á millibankamarkaði fyrir samtals 6 milljónir evra á viku, samanber frétt bankans frá 10. apríl sl. Frá því að regluleg kaup hófust í apríl hefur bankinn keypt erlendan gjaldeyri að jafnvirði 7 ma.kr. og gengi krónunnar hefur á sama tíma hækkað lítillega. Seðlabankinn hefur nú ákveðið að auka kaupin í 12 milljónir evra í hverri viku frá 13. júní 2025. Bankinn mun því kaupa 3 milljónir evra skömmu eftir opnun markaðarins á þriðjudögum, miðvikudögum, fimmtudögum og föstudögum. Meginmarkmiðið með gjaldeyriskaupunum er sem fyrr að efla þann hluta gjaldeyrisforða Seðlabankans sem fjármagnaður er innanlands og að mæta gjaldeyrisþörf ríkissjóðs.
Nægjanlegur gjaldeyrisforði hefur gegnt veigamiklu hlutverki í að viðhalda stöðugleika og viðnámsþrótti þjóðarbúsins. Horfur eru á að forðinn minnki lítillega að öðru óbreyttu á næstu misserum vegna erlendra greiðslna sem Seðlabankinn innir af hendi fyrir hönd ríkissjóðs. Seðlabankinn metur jafnframt svo að aðstæður nú séu hagstæðar til þess að auka regluleg kaup og að þau ættu ekki að hafa teljandi áhrif á gengi krónunnar. Seðlabankinn mun hins vegar endurmeta gjaldeyrskaupin eftir því sem tilefni er til.
Gjaldeyrisforðinn var 865 ma.kr. í lok fyrsta ársfjórðungs 2025 sem samsvaraði um 116% af forðaviðmiði Alþjóðagjaldeyrissjóðsins. Um miðjan júní hafði hann stækkað í 895 ma.kr. Seðlabankinn stefnir að því að forðinn nemi á hverjum tíma a.m.k. 120% af forðaviðmiðinu. [1]
Bankinn mun eftir sem áður framfylgja gjaldeyrisinngripastefnu sinni til þess að draga úr skammtímasveiflum í gengi krónunnar eins og hann telur tilefni til.
Frétt nr. 10/2025
12. júní 2025
[1] Mælikvarði á nægjanlega forðastærð er skilgreindur sem: 5%*útflutningur+ 5%*peningamagn (M3) + 30%*skammtímaskuldir + 15%*langtímaskuldum (án skulda tengdum beinni erlendri fjárfestingu).