Fyrst settur í umferð árið 1981. Í október 2005 setti Seðlabanki Íslands í umferð nýja gerð seðilsins. Stærð seðilsins er 70 x 145 mm. Aðallitur er rauður með fjöllitaívafi á framhlið.
Á framhlið er mynd af Jóni Sigurðssyni forseta, borði dreginn eftir fyrirmynd á 500 kr. seðli Landsbanka Íslands árið 1944, grunnmynstur eftir veggteppi úr eigu Jóns Sigurðssonar.
Á bakhlið er Jón Sigurðsson við skriftir, veggteppi og aðrir munir úr safni Jóns Sigurðssonar í Þjóðminjasafni, til hliðar er mynd af Lærða skólanum í Reykjavík þar sem þingfundir voru haldnir í tíð Jóns Sigurðssonar.
Blindramerki er eitt lóðrétt og upphleypt strik á framhlið.
Skoða seðil
Yfirlit yfir öryggisþætti
Öryggisþættir hafa verið til staðar í seðlum í mörg hundruð ár. Einn fyrsti öryggisþátturinn í seðlum var handskrifuð undirskrift, en margir þættir hafa bæst við, svo sem sérunninn pappír, vatnsmerki, öryggisþráður og upphleypt prentun. Síðustu ár hafa seðlabankar sett í umferð nýja seðla með fleiri og fullkomnari öryggisþáttum. Einnig hafa nokkrir seðlabankar uppfært eldri seðla sína í sama tilgangi. Hér fyrir neðan má sjá yfirlit yfir öryggisþætti fimm hundruð króna seðilsins.
Örletur í tölustöfum
Talan 500 stendur lárétt með skyggðu letri í rauðum lit efst til vinstri á framhlið og efst til hægri á bakhlið seðilsins. Á dökkum flötum í tölustöfunum er örletur sem unnt er að greina með stækkunargleri. Letrið myndar í sífellu skammstöfunina SÍ.
Blindramerki
Á framhlið seðilsins er sérstakt merki, eitt lóðrétt strik sem er upphleypt til glöggvunar fyrir blinda og sjónskerta.
Lýsandi letur
Þegar útfjólubláu ljósi er varpað á framhlið seðilsins birtist ofarlega fyrir miðju lýsandi grænn reitur með tölunni 500.
Örletur
Í ræðupúlti á framhlið er örletur sem unnt er að greina með stækkunargleri. Letrið myndar í sífellu orðin SEÐLABANKI ÍSLANDS.
Smáletur
Til hægri á framhlið seðilsins er við efri og neðri brún bylgjudregið smáletur í grunni. Letrið myndar í sífellu orðin SEÐLABANKI ÍSLANDS.
Upphleypt prentun
Á báðum hliðum seðilsins er upphleypt prentun sem nema má með fingurgómi.
Pappírsgerð
Pappír er úr hrábómull og hefur viðkomu ólíka venjulegum pappír.
Vatnsmerki í hornum
Horn seðilsins eru styrkt með vatnsmerki sem gera hann endingarbetri og öruggari.
Öryggisþráður
Öryggisþráður í gljáandi málmlitbrigðum er ofinn í seðilinn lóðrétt. Hann er 1,2 millimetrar á breidd, til skiptis sjáanlegur eða hulinn á framhlið. Sé seðlinum haldið móti ljósi sést þráðurinn óslitinn. Á þræðinum stendur 500KR.
Vatnsmerki
Í vatnsmerki er andlitsmynd Jóns Sigurðssonar forseta. Merkið sést vel ef seðli er haldið móti birtu. Myndin sést á báðum hliðum seðilsins.
Númer með rauðu letri á framhlið
Númer seðilsins er prentað í rauðum lit á framhlið. Undir útfjólubláu ljósi verður letrið gult.