- Fruminnheimta er fyrsta stig innheimtuaðgerða vegna ógreiddrar kröfu (skuldar).
- Við upphaf innheimtuaðgerða skal senda eina skriflega innheimtuviðvörun þar sem skuldara er tilkynnt um að vænta megi frekari innheimtuaðgerða verði krafa ekki greidd innan tilskilins frests (að lágmarki 10 dagar). Skuldari greiðir fast gjald fyrir innheimtuviðvörunina.
- Ef skuldari greiðir ekki kröfu innan þess frests sem tilgreindur er í innheimtuviðvörun má kröfuhafi hefja annað stig innheimtuaðgerða sem kallast milliinnheimta.
- Milliinnheimta er valfrjáls og felur í sér innheimtuaðgerðir sem eru meira íþyngjandi en fruminnheimta.
- Við milliinnhemtu má leggja innheimtukostnað á skuldara.
- Ef krafa fer í milliinnheimtu greiðir skuldari fyrir milliinnheimtubréf, tvær ítrekanir á þeim og eitt símtal. Hér má finna reglur um hámarkskostnað sem krefja má skuldara um á milliinnheimtustigi.
- Löginnheimta er síðasta stig innheimtuaðgerða og fer krafa sem enn er í vanskilum þrátt fyrir frum- og milliinnheimtuaðgerðir í löginnheimtu.
- Löginnheimta felur í sér að heimilt er að beita réttarfarsaðgerðum t.d. aðfararaðgerðum. Dæmi um aðfararaðgerðir eru fjárnám, kyrrsetning eigna, nauðungarsala o.fl.
- Kostnaður við löginnheimtu getur verið mjög mikill. Reglur um hámarksfjárhæð innheimtukostnaðar gilda ekki um löginnheimtu.
- Lögmenn sinna löginnheimtu.
- Kröfuhafi getur sjálfur hafið innheimtuaðgerðir eða falið innheimtuaðila það verkefni.
- Lögmenn, opinberir aðilar, viðskiptabankar, sparisjóðir, aðrar lánastofnanir og verðbréfafyrirtæki geta sinnt innheimtu án innheimtuleyfis.
- Aðrir þurfa að hafa innheimtuleyfi frá Seðlabanka Íslands til að geta stundað innheimtu, finna má upplýsingagjöf í tengslum við umsókn um innheimtuleyfi hér.
- Kannaðu hvort krafa hafi farið í fruminnheimtu.
- Farðu vel yfir innheimtukostnað og kannaðu hvort hann sé í samræmi við reglugerð um hámarksfjárhæð innheimtukostnaðar.
- Ef skuldari getur ekki greitt skuldir sínar vegna fjárhagsvanda er hægt að leita ókeypis ráðgjafar hjá Umboðsmanni skuldara.
- Innheimtulög nr. 95/2008
- Reglugerð nr. 37/2009 um hámarksfjárhæð innheimtukostnaðar o.fl.
- Lög nr. 77/1998 um lögmenn gilda um löginnheimtu.
- Lögmannafélag Íslands hefur eftirlit með lögum um lögmenn.
- Seðlabanki Íslands veitir innheimtuaðilum innheimtuleyfi og hefur eftirlit með að starfsemi þeirra sé í samræmi við lög og reglur sem gilda um starfsemina.
- Seðlabanki Íslands hefur engu hlutverki að gegna vegna löginnheimtu.
- Seðlabankinn tekur við ábendingum neytenda ef starfshættir innheimtuaðila eru ekki í samræmi við lög og reglur eða góða innheimtuhætti. Hægt er að senda ábendingu eða fyrirspurn á vef Seðlabankans.
- Seðlabanki Íslands bendir á upplýsingar á vefnum um úrræði neytenda, en hann leiðbeinir neytendum að öðru leyti um úrræði sem þeir hafa til að ná fram rétti sínum. Hér má nálgast verklagsreglur fjármálaeftirlits Seðlabanka Íslands vegna fyrirspurna og ábendinga.