Seðlabanki Íslands | Markaðsviðskipti

Svið markaðsviðskipta annast framkvæmd peningastefnu Seðlabanka Íslands. Til þess að ná markmiðum sínum um stöðugt verðlag og fjármálastöðugleika stundar Seðlabankinn viðskipti við fjármálastofnanir. Þegar bankinn ákveður vexti í viðskiptum við innlend fjármálafyrirtæki hefur hann áhrif á vexti á peningamarkaði. Seðlabankinn fylgist með innlendum gjaldeyrismarkaði og getur gripið inn í millibankamarkað með gjaldeyri þegar ástæða er talin til. Bankinn sér jafnframt um varðveislu og ávöxtun gjaldeyrisforða bankans og hefur einnig umsjón með lánamálum ríkissjóðs.

Aðgerðir Seðlabanka Íslands

Seðlabanki Íslands birtir ýmsar tölulegar upplýsingar um viðskipti sín, m.a. um bundin innlán, bindiskyldu, lán gegn veði og skuldabréfakaup.

Markaðsaðgerðir

Megintilgangur markaðsaðgerða Seðlabankans er að stuðla að miðlun peningastefnunnar og þar með að stöðugu verðlagi, og varðveita fjármálastöðugleika. Hér má m.a. finna reglur um viðskipti fjármálafyrirtækja við Seðlabankann, upplýsingar um stjórntæki og fleira.

Markaðir

Til að sinna verkefnum sínum getur Seðlabankinn ýmist þurft að beita sér á tilteknum fjármálamörkuðum eða að hafa visst eftirlit með þeim. Hér eru upplýsingar um millibankamarkað með gjaldeyri, millibankamarkað með krónur (REIBOR) og vaxtaviðmið í íslenskum krónum (IKON).

Veðhæf verðbréf

Ákveðnar reglur gilda um verðbréf sem gilda sem hæfar tryggingar í viðskiptum við Seðlabankann, reglur nr. 1200/2019, með seinni breytingum. Mótaðilar Seðlabankans í viðskiptum og þátttakendur í millibankagreiðslukerfi Seðlabankans geta lagt fram slík veðhæf bréf sem tryggingar, annars vegar vegna heimilda í greiðslukerfum og hins vegar sem tryggingu fyrir veðlánum, þegar þau eru í boði.

Gjaldeyrisforði

Gjaldeyrisforði Seðlabankans eru m.a. innstæður í erlendum bönkum og erlend skuldabréfaeign. Hlutverk forðans er meðal annars að draga úr áhrifum sveiflna í greiðslum á milli Íslands og útlanda, t.d. með inngripum á gjaldeyrismarkaði, með hliðsjón af stefnu bankans í peninga- og gengismálum og að draga úr líkum á að fjármagnshreyfingar til og frá landinu raski fjármálastöðugleika. Þá er forðinn einnig sérstakur öryggissjóður.

Lánamál ríkisins

Seðlabankinn sér um verkefni varðandi lánamál ríkisins samkvæmt sérstökum samningi við fjármála- og efnahagsráðuneytið. Þannig sinnir Seðlabankinn ýmsum verkefnum varðandi lántökur ríkissjóðs og ríkisstofnana innanlands og utan, útgáfu og sölu ríkisskuldabréfa á innlendum markaði og aðra skuldaumsýslu fyrir ríkissjóðs, svo og endurlán lánsfjár, ríkisábyrgðir og Ríkisábyrgðasjóð.