Meginmál

Seðlabanki Íslands leggur áherslu á metnaðarfullt starfsumhverfi með það að markmiði að byggja upp trausta liðsheild. Með áherslu á virðingu og vellíðan, jafnrétti, þekkingu, fagmennsku og framsækni nær bankinn markmiðum sínum með árangursríkum hætti.

Mannauðsstefna

Mannauðsstefna Seðlabanka Íslands tekur mið af því lykilhlutverki bankans að gæta almannahagsmuna, með því að stuðla að stöðugu verðlagi, fjármálastöðugleika og traustri og öruggri fjármálastarfsemi. Stefnan miðar að því að byggja upp trausta liðsheild, með áherslu á virðingu og vellíðan, jafnrétti, þekkingu, fagmennsku og framsækni. Þannig stuðlar hún að því að bankinn nái markmiðum sínum með skilvirkum og árangursríkum hætti.

Megináherslur

Að hafa alltaf á að skipa hæfu og metnaðarfullu starfsfólki sem myndar sterka liðsheild innan bankans.
Að starfsumhverfið styðji við andlega og líkamlega vellíðan starfsfólks.
Að jafnréttissjónarmiða sé ávallt gætt í starfi bankans.
Að starfsfólk viðhaldi þekkingu sinni, nýti hana vel í störfum sínum, miðli þekkingu og styðji með því áherslur framsækins seðlabanka
Árangursdrifna vinnustaðamenningu sem einkennist af fagmennsku og skilvirkum vinnubrögðum til að tryggja markvissa og góða ákvarðanatöku.

Laus störf

Laus störf eru ávallt auglýst á Starfatorgi og á ráðningarvef Seðlabankans og hægt að sækja um þau þar. Einnig er hægt að fylla út almenna umsókn á ráðningarvef bankans.

Ráðningarvefur Seðlabanka Íslands

Jafnréttismál

Það er stefna Seðlabankans að allt starfsfólk njóti jafnra launa og sömu kjara og réttinda fyrir sömu eða jafnverðmæt störf þannig að enginn kynbundinn launamunur sé til staðar hjá bankanum

Seðlabankinn leggur áherslu á að bjóða starfsmönnum sínum samkeppnishæf laun og starfskjör. Laun starfsmanna Seðlabankans eiga að endurspegla þær kröfur sem gerðar eru til þeirra um þekkingu, ábyrgð og hæfni til að sinna starfinu.

Jafnréttisstofa hefur veitt Seðlabanka Íslands heimild til að nota jafnlaunamerkið. Seðlabanki Íslands hlaut formlega jafnlaunavottun 10. janúar 2019, en það er vottun um að Seðlabankinn starfræki launakerfi sem stenst kröfur jafnlaunastaðalsins ÍST 85:2012. Seðlabankinn er fyrsti seðlabankinn í heiminum sem hlýtur jafnlaunavottun.

Jafnlaunastefna Seðlabanka Íslands