Laus störf

SEÐLABANKI ÍSLANDS leitar að öflugum leiðtoga til að gegna starfi framkvæmdastjóra fjármálastöðugleikasviðs. Framkvæmdastjóri heyrir beint undir seðlabankastjóra í skipuriti bankans.

Fjármálastöðugleikasvið er eitt af kjarnasviðum bankans. Sviðið annast greiningu á áhættu í fjármálakerfinu, hefur eftirlit með gjaldeyrisjöfnuði lánastofnana og tekur þátt í mótun þjóðhagsvarúðarreglna fyrir fjármálakerfið til að draga úr kerfisáhættu. Þá annast sviðið eftirlit samkvæmt lögum um gjaldeyrismál. Fjármálastöðugleikasvið mótar stefnu fyrir rekstrarumgjörð kerfislega mikilvægra fjármálainnviða, hefur umsjón með atvikamiðstöð fjármálakerfisins og netárásarprófunum fyrir stofnanir og fyrirtæki sem eru mikilvæg fyrir íslenskt fjármálakerfi. Sviðið hefur umsjón með útgáfu ritsins Fjármálastöðugleiki og undirbýr efni sem lagt er til grundvallar ákvarðanatöku hjá fjármálastöðugleikanefnd.

Helstu verkefni og ábyrgð:

• Stýrir og leiðir starfsemi sviðs fjármálstöðugleika.
• Mótar stefnu, framtíðarsýn og verklag sviðsins í samræmi við stefnu og markmið bankans.
• Þátttaka í mótun fjármálstöðugleikastefnu.
• Ber ábyrgð á ritstjórn og kynningu á riti Seðlabankans um fjármálastöðugleika.
• Ber ábyrgð á undirbúningi greininga, kynninga og ákvarðana fyrir fjármálastöðugleikanefnd þ.m.t. mótun þjóðhagsvarúðarreglna til að draga úr kerfisáhættu.
• Stuðlar að viðnámsþrótti og framþróun kerfislega mikilvægra fjármálainnviða.
• Ber ábyrgð á upplýsingagjöf tengdri verkefnum sviðsins til bankastjóra, annarra starfseininga og nefnda bankans auk kynninga til ytri aðila.
• Byggir upp sterka liðsheild stjórnenda og sérfræðinga á sviðinu.
• Stuðlar að traustu samstarfi við yfirstjórn og önnur svið innan bankans.
• Ber ábyrgð á samskiptum sviðsins við innlenda, erlenda og opinbera aðila.
• Þátttaka í alþjóðlegu samstarfi á sviði fjármálastöðugleika.

Menntunar- og hæfniskröfur:

• Framhaldsmenntun á háskólastigi sem nýtist í starfi, s.s. á sviði hagfræði, fjármála, verkfræði eða sambærilegt.
• Góðir leiðtogahæfileikar og stjórnunarreynsla.
• Víðtæk þekking og reynsla af fjármálamörkuðum og fjármálakerfinu.
• Þekking og reynsla af þjóðhagsvarúðartækjum, greiningum og rannsóknum á sviði fjármálastöðugleika.
• Þekking og reynsla af fjármálainnviðum.
• Góð greiningarhæfni og hæfni til að vinna með flókin viðfangsefni.
• Færni í mannlegum samskiptum og árangursríkri teymisvinnu.
• Áræðni, heiðarleiki og metnaður til að ná árangri í starfi.
• Góð færni í að tjá sig í ræðu og riti á íslensku og ensku.

Frekari upplýsingar um starfið veitir Íris Guðrún Ragnarsdóttir, framkvæmdastjóri mannauðs og menningar, mannaudur@sedlabanki.is. Umsóknarfrestur er til og með 17. ágúst 2026.

Um er að ræða 100% starfshlutfall með starfsstöð í Reykjavík. Með umsókn þarf að fylgja ferilskrá og kynningarbréf þar sem gerð er grein fyrir ástæðu umsóknar og hæfni viðkomandi til að gegna starfinu rökstudd.

Við ráðningar í störf hjá Seðlabanka Íslands er tekið mið af jafnréttisstefnu og jafnréttisáætlun bankans og er fólk af öllum kynjum hvatt til að sækja um. Laun greiðast samkvæmt kjarasamningi samtaka starfsmanna fjármálafyrirtækja. Umsóknir gilda í sex mánuði og öllum umsóknum verður svarað þegar ákvörðun um ráðningu hefur verið tekin. Vakin er athygli umsækjenda á því að um ráðningarferlið gilda m.a. stjórnsýslulög nr. 37/1993, upplýsingalög nr. 140/2012 og lög um réttindi og skyldur starfsmanna ríkisins nr. 70/1996.

Seðlabanki Íslands er sjálfstæð stofnun í eigu ríkisins sem heyrir undir forsætisráðherra. Markmið bankans er að stuðla að stöðugu verðlagi, fjármálastöðugleika og traustri og öruggri fjármálastarfsemi. Þá skal bankinn sinna viðfangsefnum sem samrýmast hlutverki hans sem seðlabanka, svo sem að varðveita gjaldeyrisforða og stuðla að virku og öruggu fjármálakerfi. Hjá Seðlabankanum starfar öflug liðsheild og leggur bankinn ríka áherslu á metnaðarfullt og hvetjandi starfsumhverfi sem einkennist af fagmennsku, heilindum, auðmýkt og áræðni.

Við sérstakar aðstæður getur komið til þess að fjármálaeftirlit Seðlabanka Íslands þurfi að semja við sérfræðinga til að sinna tilteknum verkefnum. Þá hefur fjármálaeftirlitið sérstaka heimild til að skipa sérfræðing til að athuga tiltekna þætti í starfsemi eða rekstri eftirlitsskylds aðila eða til að hafa að öðru leyti sértækt eftirlit með eftirlitsskyldum aðila, sbr. 2. mgr. 9. gr. laga nr. 87/1998, um opinbert eftirlit með fjármálastarfsemi. Jafnframt hefur fjármálaeftirlitið meðal annars heimild til að skipa við sérstakar aðstæður fjármálafyrirtæki bráðabirgðastjórnanda, sbr. 107. gr. e laga nr. 161/2002, um fjármálafyrirtæki, og vátryggingafélagi slitastjórn, sbr. 152. gr. laga nr. 100/2016, um vátryggingastarfsemi.

Fjármálaeftirlitið tekur við ferilskrám, og eftir atvikum kynningarbréfum, þeirra sem eru reiðubúnir að gefa kost á sér til slíkra starfa. Einnig geta fyrirtæki gefið kost á tilteknum starfsmönnum sínum til slíkra starfa. Leitað er að einstaklingum með fjölbreytta þekkingu og reynslu á sviði lögfræði, viðskiptafræði, hagfræði, verkfræði, fjármálamarkaða, reksturs, stjórnunar, upplýsingatækni, reikningsskila o.fl.

Ferilskrá, og eftir atvikum kynningarbréf, skulu gefa glögga mynd af menntun og reynslu hlutaðeigandi. Upplýsingarnar verða aðgengilegar viðeigandi stjórnendum innan fjármálaeftirlitsins ef til greina kemur að semja við sérfræðing til að sinna tilteknu verkefni. Þá skulu upplýsingar um heimilisfang, símanúmer og netfang fylgja ferilskránni. Jafnframt er mikilvægt að fram komi upplýsingar um tengsl hlutaðeigandi við einstaka eftirlitsskylda aðila. Vakin er athygli á því að almennt koma starfsmenn eftirlitsskyldra aðila ekki til greina til umræddra sérfræðistarfa.

Fyrirspurnir má senda á netfangið sedlabanki@sedlabanki.is.

Takk fyrir að sýna því áhuga á að starfa með okkur í Seðlabanka Íslands.

Seðlabanka Íslands ber skylda til að auglýsa opinberlega laus störf samkvæmt 3. mgr. 7. gr. laga nr. 70/1996 um réttindi og skyldur starfsmanna ríkisins, sbr. nánar reglur nr. 1000/2019 um auglýsingar á lausum störfum með síðari breytingum.

Takk fyrir að sýna því áhuga að koma í starfsþjálfun hjá okkur í Seðlabanka Íslands.

Hér getur þú sótt um að koma til okkar í starfsþjálfun. Við förum reglulega yfir umsóknir og verðum í sambandi ef við höfum lausa starfsþjálfunarstöðu við þitt hæfi. Starfsþjálfun er einstakt tækifæri fyrir háskólanema til að öðlast hagnýta og starfstengda reynslu og er markmið okkar að bjóða reglulega upp á fjölbreytt tækifæri fyrir nemendur til að kynnast verkefnum og starfsemi bankans.

mannaudur@sedlabanki.is