Fara beint í Meginmál

Íslenskir lífeyrissjóðir starfa samkvæmt lögum nr. 129/1997 um skyldutryggingu lífeyrisréttinda og starfsemi lífeyrissjóða, en lögin tóku gildi hinn 1. júlí 1998. Grunnlöggjöf flestra aðila á fjármálamarkaði samanstendur af regluverki sem byggir á Evróputilskipunum sem teknar eru upp í EES samninginn. Þetta á þó ekki við um íslenska lífeyriskerfið þar sem regluverk lífeyrissjóðanna byggir að mestu á séríslensku regluverki.

Lög nr. 129/1997 eru í tólf köflum og gilda um alla lífeyrissjóði og vörsluaðila lífeyrissparnaðar eins og nánar er kveðið á um í lögunum.

Seðlabanki Íslands hefur framsýnt og áhættumiðað eftirlit með starfsemi lífeyrissjóða, greinir helstu áhættuþætti í rekstri þeirra ásamt því að fylgjast með þróun á markaði. Þá fylgist Seðlabankinn með því að lífeyrissjóðir starfi í samræmi við lög sem um starfsemi þeirra gilda og að gripið sé til viðeigandi ráðstafana þegar tilefni er til. Bankinn leggur áherslu á góða stjórnarhætti innan lífeyrissjóða, áhættustýringu og innra eftirlit.

Lög, reglur og eyðublöð

Samantekt úr ársreikningum lífeyrissjóða og ársfjórðungsleg sundurliðun fjárfestinga lífeyrissjóða og vörsluaðila séreignarsparnaðar

Seðlabanki Íslands birtir ársfjórðungslega sundurliðun fjárfestinga lífeyrissjóða og vörsluaðila séreignarsparnaðar og árleg samantekt úr ársreikningum lífeyrissjóða ásamt kennitölum og upplýsingum frá vörsluaðilum séreignarsparnaðar.